كما هو معروف عني بالشجاعه وحس الفرسان والحنكه والدهاء وعدم الخوف من البسس يومني صغير<,,, شي واضح لكم كما ذكرت في موضوعي السابق
فأحب أعطيكم قصه ثانيه عن هالشجاعه والحنكه اللي إن شاء الله تتعلمون منها الكثير
كن حنونا على البسس <,,, اللي تقولي ميوووو <,,, كلنا عرفناها الموضوع اللي راح
ذات يوم وأنا جالس عند باب بيتنا وداخل جو رومنصصصي
قاعد أغني إغنية توصي شي أنا بكره مسافر <,,, والله والصوت الزين لو يسمعني راشد خلى أبو الفن
المهم مرت سياره مسرعه من عند باب بيتنا ومطول المسجل جاء براسي الهياط المعتاد قلت وش عنده مار ومطول المسجل؟
وأشل هالحصاه ( الحجر) وررررررررر ماعندي تفاهم<,,, أبي قزازته
شوي مع دزته وسرعته ما أمداها توصله وهي بالهوى وتعدت السياره حقته
وإلاني أسمع هالصوت (طعععععع) بعده جا هالصوت ( ميووووووووو)<,,, اللي أستنتجته من هالأصوات إنها وقعت بالزباله (أعزكم الله) لأني أشووف بعدها مع الصوت الثاني بسه نقزة
أنا طبعا كما هو معروف عني بالشجاعه نقزة نقزتي المعتاده نقزة الفرسان وإدعس ياولد وينك يالبيت هههههه
وأدخل وأصك الباب <,,, من خاف سلم باقي وقع القصه الأولى فييه
وأجلس يومين بالبيت ماطلعت ومع مرور هاليومين أنبني ضميري جداً جداً جداً قلت ليش
أنا دايماً أخوف هالقطاوه ولاعاد بقى قطوه بحارتنا كلهم أنحاشو منها <,,, شي جميل شي واضح
جاتني النخوه قلت سبونج قم ياولد بس ورح للقطوه اللي في البراحه اللي ورى بيتكم وعطها حليب هي وعيالها
وأطلع بعد غياب يومين من الحاره ويجوني الشله حقيني ,, سلامات ياولد وينك ماتنشاف ومن هالكلام
قلتهم لا أبد بس قلت أعطي مساحه لكم تبرزون مواهبكم وقوتكم على ورعان الحاره
ماعلينا
طلعت للبقاله وأشري حليب السعوديه وارجع أبي أعطيها هالبسه هي وعيالها ويومني ماشي بالطريق
قلت بنفسي وش أحط هالحليب لهم فيه وطرى براسي فكره شنيعه جداً اللي هي أروح أجيب صحن من بيتنا
وأشيل الصحن واروحلهم ويوم جيتهم وأنا أمشي حبه حبه وأقول بنفسي مهو لازم شكلها شبعانه <,,,مهو خايف
ويوم قربت منها وإلاها جالسه وعيالها يلعبون وراها حليلهم جيت وأصب الحليب بسرعه فائقه أبي أفتك بس وراح نصه بالأرض<,,, من الشجاعه
وأحط الحليب لهم ويشربون وصارت البسه صديقتي الحين بكل سهوله فائقه وبعد معاناه
وقلتلها صافي يالبن ردت علي قالت صافي ياقشطه<,, لاعاد زوتها
وقمت ورحت من عندهم وأنا مرتاح الحمدلله
الحكمه من هالقصه
,,,,, أرحموا من في الأرض يرحمكم من في السماء
ياجماعة الخير سواء إنسان مسكين من هالجاليات , أو حيوان أعزكم الله , أو أين كان لازم تكون قلوبنا صافيه وتكون فيها رحمه
ولنتخذ رسولنا قدوه لنا في الرحمه